Apaciye Apsekilek Petakiw
pstemon akanotemakenakenotem Gwen Bear (.wav, 850k)
Kis nihi kiskahk menimkkwehs kwenehsel naka apsekilek petakiw petkowtowok, cel wot apsekilek petakiw ‘tinepenil apsekikwil penapskwol wonowek. Kwenehsel wolitahaso nemiyat kwosel. Koluskap nemitonehpen mace wihtapekamat keteki skinohsisek en ec macelwahan apsekilek petakiw en ec macwitakwsin anhasahp petakiyik naka totahtowesiyen tahalo wen kehtwitahkw skwotes.
Psiwte kisi mahkwahtowok siwi tehpok tetelahskoyawa. Mihkemwehso ‘tapaciyan makotemel petakiw keti nemiyapenil. Koluskap tiyal eli mihkemwehso elmiyat tama skitkemikw meteket en ec pataciyan kwecktek meciyakw naka piyami ep wolehso ahskowahsit en sako kwenehsel ‘thesisemel kisi ‘tahatemen weci cipewkelal sakemel ehtahsikiskahk.
Monomek ec ehtahs miyawtekmen sakem ‘twikwam en etta elmitwiyahtit ec ‘toposiyik en mahkiyewehs mihkemwehso kisitahatemen weswesiyin ewikit eli kekw pileweyik kisi leyik wikwamek. Kwilomal ‘tehpitemel naka eli cowi nemiyat sako macahan. Peciyat wikwamek mihkemweso keciciyal apsekilek petakiw, etlayat kwocemek naka powatmowan nicanel nemiyan. Nemiyat mihtawksel apsekilek petakiw kakaloman nmihtawks. Psiwte wen lamiw wikwamek notwawal apsekilek petakiw psiwte notekwaskohltowok mate wen nemiyal mihkemwehsowol tepok kloskap en wiskiwahan kloskap eli ‘thesisel kisi kweci katsit. Mehsi cowi katsiyen tiyal kloskap ‘ktalwi katsokwi, notaha. Cowitpet kwolitahasin kwetaha ktepitem, mihkemwehso tehpo notewat kloskapiyal ‘tosimisel penakaciyel naka en mehsewelesin ciw psiwte eyohltihtit. Wolitahaso nemiyat kwosel naka menatowan nihtel penapskwol etekpenil wonowel weci kisi menehtowat nit petakiw litposowaken, cowec tikec kinhseno item mihkemwehso tahalo te mihtawksel.
Mihkemwehso telmiyan naka ‘tapacihpton nit kelwahk samakwan cel kwenesel kiswehkatpen weco wolikit, tahalo neket kisi nihpwihtit. Petakiw, kwenehs ‘thesisel item, kecicitonepen eli kisi nipiyekw kenok ntalwi peciyapen. Ntapi katohnkahtipen sawonehsonok weci kisi nehpohok nekemekilek ahthoses. Cowi tehc makwahatipin ciw nipowoltimek apc.
