akanotemakenel

Kiluwaha Petaksis

audio pstemon akanotemaken
akenotem Gwen Bear (.wav, 1.6 mb)

wigut
Wolastoq
kospisun
patqap
wigut
kiluwaha Petaksis
posonut
Cowitpot yakw olsonowakon wehkaso weci lihtasik kekw

Koluskap pihce ‘tehkwi nomiyan Mikomwesowol sako natsakiyan mahkiyew newokmowiniyik peciphat. Peciyat wikowak mate ihiw. Nomiyal kwenossol naka Monimqehsol, kisi nekoma yahawal eli ksihkassit Petaksis, nit wec kisi nokolat mikomwaso ‘tepitemol. Koluskap pecitahaso eli oc naci kilowahat not ksihkassit.

Koluskap kisi kakalomal Petakiyol. Nekom yakw kisi wihkowelat skinohsisol, ipocil mate not ehpit topinowawiyil. ‘Tapacimilan oc yakw kenok Kwenssahcuwi liye ktotonok oluwikonol kisqol naka oceman psi wenil.

Kisi olokimal monimkwehsol weci lohkalat mowiniyik. Kis potelomon pahkw olokiw ktotonok weci macephat epilicil. “Knohseksin newol kiskol onoc knacipholom”.

Monimkwehs etololuhkatok motekonol lintu. Notowal Sakom. Kisi pcitahkalal Essol weci natsakihtak kekeleyik. Apaciye yakw Koluskap. Mate wolitahatomowon Sakom.

On solakiw peciyan kenoss hesisol. Koti yakw nomiyokol Koluskap kisi yahal kekw elonokok.

Monimqehs kisi okima Sakomol ciw psi kisi pomiyewik. “Coskowahtuwok nikwt”. “Nil oc nikwt nehpahak,” itom Hesis, cel ponapskol otetol wonowik. “Kinson kil,” itom Koluskap. “Ponaskwoil. Kwointet e koti olohkan?” “Kiskehk kimkok nil petakiyik,” Koluskap apc potelomon pahkw olokiw ktotonok. Elomitowiyat not skitap. Nemiyat ohsimisol, etocilowahat, sesolahkiw te petakiyik potelomoniya ktoton. Mate kekw piyemiyew.

Cipew kesso Sakom. Litahaso eli not ehpit mehcinat. Apc Essol pocitahkalan. Tiyal Sokomol eli kotok skitap nit ihit. Kenoss hesisol.

Koluskap ma wolitahat omuoan kisi lessik. Kisi wesowi ponomom ktoton, naka kwospen kisi ponomom. Kisi wihkwetowan Sakom ‘tolsonowakom. “Kat oc apc Petak kisi wekihtowon ktoton, tehpo oc tupkwon naka athosossok.” Cowitpot yakw olsonowakon wehkaso weci lihtasik kekw.