Mihkemwehso Nipwiw
pstemon akanotemakenakenotem Gwen Bear (.wav, 800k)
Kweni sakem lohkatek nipoweltimek ciw pilskwehsisek, monimkwehs kwenahsel tapi weswesin kci cekwolhsek en nit peciyat mehskemen nit samakwan, Mihkemwehs kiswehkat weci kisi wolikehsihtit nickinwitpenik pilskwehsisek eli skat kisi wekihtakw. Kwenehs kisi kihsikwenhso naka kehsatpehnsin ewehket nit samakwan, te piyemi wolikit. Nekem kisi katon sisekw eweket kakwskohswi skwetewamhk en toliyan eteli makwahatimek.
Sakem, Koluskap naka mihkemwehso epohltopenik eteli skowatmotit keti nipowihtit mihkemwehso maka peskwol sakem tosel. Kwenehsel kikimiw teliyan asit epohltihtit naka tetli pestowan kekw eteli skowetmohtit en sakem keti milowanel pesko tosel weci nipomat, mihkemwehs titemen. Aha, eci wolikit ktos kenek ec net etelekat pasitokwit nilawey pakw ponemen ec ktakmikw nakem ec nipomok monimkwehs kwenehsel notemen psiwte kekw naka kakawiyan ehtek nit samakwan, en kehsikwenhsen naka kehsatpenhsin cel akwamhk toci wolikin elwete piyesomel samehton takwmikw, en eteli wolehtakw piyehsomel notemen eteli pemkahtimek apc.
Psiwte pilskwehsisek pemkahtowok naka ‘tekweci ‘tpahsitokememiya mihkemwehso pakwiyil. Kenok sakem ‘tosel tehpo kisehtakw nekem ‘tpastolowatemen. Psiwte kaklwahtowok “nipowohltin” mihkemwehs sehkehsin en titemen skowasohltine tekiw peciyatit ketekik pilskwehsisek. Piyemitahatemen eltekwit pilskwehsis katek eli wolikit. En peciyan kwenehs naka macekan, eci psiw wen wolinwat cili mihkemwehso, en wiwenekan nihikehs en ehtahs citwamkwehsit, nihkani epit mihkemwehso en titemen “citewamkwetwol sakem.”
Kwenehs kemasi pemkatemen nit pakw, naka kisi ‘teweptemen pakw naka tewepi peskowatemen pakwiyil, en napitehsen takwmikw kwihiw epit mihkemwehso naka mehsi citwamkwelat sakemel en tepin elkwiw kloskap thesisemel, en woliw ete wotemakenel kehspisowenek naka woliw pskoletman naka telenemowan kwenehs, en ehta meci temat mihkemwehso titemen meskw te ehpit samelawiyil totmakenel kesna metkwapem tepitemet te temhk kisi samehtakw. Kehsi makwahatit nipowoltemek. Cehskowawletowok sakem tosel ipcel sesmitahasohltowok eci wot seslakiw eci wolikit, sakem tena cehskowe eli skat ‘tosel nekem nipomat kloskap ‘thesisemeli meci nipowoltimek cel peci sakem metemtemo eli skat ‘tosel skat kisi nipowehkhat. Tiyal ete mihkemwehsel ntitemopen nipomahc pilskwehsis tan piyemi tawatokwit. En sakem kwecimolal keloskapel. Kenok kloskap tihkalal witapiyil.
