Mikumwesu Nehpahal Piluwi Kluskpol
pstemon akanotemakenakenotem Gwen Bear (.wav, 1.5 mb)
Koluskap naka nisuwok skitapiyik kisihtuniya nisnonul kolhihonol ciw athusossok tepelomat not ‘taqhomuhs.
Elomuhsat, ‘peciyan eyultitit ‘tutem. On kakaluman. Kenuk kolhikonok mecimessuwok, tehpu skat pesq, not piyemi kinsonit. Koluskap ‘tahcuwi nuhsuphoqalal. Kisi nihkantehkuwal naka ‘taskuyan. Kisi nehpahal eweket tap naka pahq. “Psi te mehcinhutuwok”, itom.
Qenewestutit Koluskap naka Sakom, peciye Soqehs. “Iyu wen Posu anapekok. Sakom ‘kisi pcitahkalal Nimaq suwesol weci natsakitaq tan not mikumwesi ‘kosona skat. “Apsokil skitap”, itom apaciyat.
Eci wolitahasit Koluskap opocil kocicihtuneli not uhsimisol. Pihce ‘tehqi nomiyan. Apc ‘toliyan nimaqsuwes naka kinuwehtuwan eli koluskap koti nomiyat.
‘Kikimiyan nit. Mate wen nomiyawiyil yaka nisipumat Kluskapol. Toqite wolitahasuwok.
Kisi yahal Koluskap ciw not taqhomush qeci itok eli nekom Kluskap, naka kisi nehpahat mawsuwinu. Mikumwesu itom, “nil oc nehpaha.” Kisi olkimal Soqehsol weci wihqehtaq ‘tapim naka naci peskan siskuk qen qahsit.
Nutuwal kenuk not ‘taqhomuhs. ‘Taluwi nehpahal. “Nil tehc wen knomiyuk. On kisi qolipilan athusossisok oposik.
Natacomin eyitit Sakom naka Koluskap. Koluskap kisi kakaluma muwiniyik weci mahahtit athusossisok.
Psite naci saphawa polamok on wihqacultiniya. Koluskap papehcikesu ciw kcihnaqc.
“Mec al naninsk nican,” itom Mikumwesu.
“Tan olu Petaksis naka ktehpitem?”
“Pihce ntehkuwi nomiya. Kosiyahsonuk olomutiyik.”
Qotinsk ikotonol nit wikultuwok utenak.
