Klu Wikuwamkomal Kcihqnacol
pstemon akanotemakenakenotem Gwen Bear (.wav, 1.3 mb)
Petaksis pomikotone. Koluskap koti macehe. Pawatomon ‘tuwasomol wicewkun. Mikuwesu, na nekom liye. ‘Kisuwehkaniya ponapsqeyoqiton. Petkawotultuwok yut otanek. Mate nit Sakom ihiw kenuk kcihqnac, Kluskap ‘kolamuksol, nit iyu. Maleyu yaq mate wikuwaci kotunkew.
On neqt peciye Klu, kci sips. “Kwey”. Kcihqnac tiyal. “Oey”, itom Klu. Kcihqnac ‘tapituwan pqotey wiyuhs, mate kenuk keq elosossomit. Eci kispahtek wiyuhs on ehta neqtomon. Aluwolatok on mehcinan. Kcihnaqc kisi ‘tomasal, pqotelan, naka ‘tekhulan wonosqi.
Apatapasihtit mawsuwinuwok wolite kcicihtuniya eli kisi nehpahat Kluwol. Sakon Nutamet wolite kisi ewepipunal oposik. Nit woslossok eyit. On Nutamet macuphuwan.
Petapasult ihtit Klu wicik, nomiyawa wonosqiy. Etoli tpitahasit Kcihqnac tan oc li taweyuwan mawsuwinu. Nit te na ‘poneqiyan. Mawsuwinwok nomiyawal kenuk petapasultitit, tehpu te walot nemiyahtit. Kcihqnac katsu lamiw wolo kaskuk.Kenuk mowsuwinuwok nomiya wal. Koti nepahawal.
“Ekulane” itomuk. Kcinaqc itom. “Nil oc nacipha ahpap”. Saku ma ‘tolluhkawoniya. “Laqosane,” itomuk. Kcihqnac iton, “Nil oc naciptun wapsq”. Saku ma na nit ‘tolluhkawoniya. “Copoqossimane” itomuk, “Kacu”, itom Kcihqnac. On ehta pisahkalaniya sipok.
Litahasultuwok eli copoqossit. Kenuk tepu olomohom. Wolasuwi yusu eli kis taweyuwat nihiht mawsuwinu.
